నెట్స్‌లో భారీ షాట్లతో అదరగొట్టిన వైభవ్.. వీడియో షేర్ చేసిన బీసీసీఐ

ఐర్లాండ్‌తో తొలి టీ20 మ్యాచ్‌కు టీమిండియా సిద్ధమైంది. బెల్‌ఫాస్ట్ వేదికగా ఇవాళ ఈ మ్యాచ్ జరగనుండగా, భారత ఆటగాళ్లు ముమ్మరంగా ప్రాక్టీస్ చేశారు. అయితే ఈ ప్రాక్టీస్ సెషన్‌లో 15 ఏళ్ల యువ ఆటగాడు వైభవ్ సూర్యవంశీ ప్రత్యేక ఆకర్షణగా నిలిచాడు. సీనియర్ ఆటగాళ్లతో కలిసి నెట్స్‌లో తీవ్రంగా శ్రమించాడు.

తుది జట్టులో చోటు దక్కుతుందో లేదో తెలియకపోయినా, వైభవ్ మాత్రం తన ప్రాక్టీస్‌తో అందరి దృష్టిని ఆకర్షించాడు. భారత బౌలర్ల బౌలింగ్‌లో ఏమాత్రం భయం లేకుండా ధాటిగా బ్యాటింగ్ చేశాడు. నెట్స్‌లో భారీ షాట్లు ఆడుతూ తన సత్తా చాటాడు. వైభవ్ ప్రాక్టీస్‌కు సంబంధించిన ఓ వీడియోను బీసీసీఐ తన అధికారిక 'ఎక్స్' (ట్విట్ట‌ర్‌) ఖాతాలో పంచుకుంది. ఈ వీడియోలో అతను అలవోకగా బౌండరీలు బాదడం కనిపిస్తోంది.

టీనేజ్ ఓపెనర్ అయిన వైభవ్, ఐర్లాండ్‌తో మ్యాచ్ కోసం రకరకాల షాట్లను ప్రాక్టీస్ చేస్తూ కనిపించాడు. అతని బ్యాటింగ్ శైలి, ఆత్మవిశ్వాసం చూసి క్రీడాభిమానులు ప్రశంసలు కురిపిస్తున్నారు. ఇంత చిన్న వయసులోనే భారత జట్టుతో కలిసి నెట్ ప్రాక్టీస్ చేసే అవకాశం దక్కించుకోవడం విశేషం.